Hið íslenzka ástarrannsóknafélag

Hið íslenzka ástarrannsóknafélag er skipað fræðimönnum af ólíkum sviðum Háskóla Íslands. Hugmyndin að ástarrannsóknafélaginu kom upp þegar Anna Guðrún Jónasdóttir, fyrsti íslenski doktorinn í ástarrannsóknum, hlaut heiðursdoktorsnafnbót við stjórnmálafræðideild Háskóla Íslands.

Silja Bára Ómarsdóttir og Berglind Rós Magnúsdóttir sem hylltu heiðursdoktorinn ásamt fjölda annarra í hátíðarsal Háskóla Íslands fengu hugmyndina að félaginu sem varð að veruleika stuttu síðar.

Í þakkarræðu sinni sagði Anna Guðrún m.a.: „Ritgerðin fékk nafnið Love Power and Political Interests. Towards a Theory of Patriarchy in Contemporary Western Societies (Ástarkraftur, vald og pólitískir hagsmunir. Tilraun til skýringar á karlveldinu í nútíma vestrænum þjóðfélögum).

Eins og nafnið bendir til snýst niðurstaða þessa verks um ást og þann sérstaka skapandi kraft og lífsorku sem ég vil meina að yfirfærist milli fólks í félagslegum tengslum okkar sem kynverur. Ég tala hér um munstur af ójöfnuði (breytilegum, en seigum) í forsendunum fyrir samskiptum kynjanna varðandi það hvernig við njótum – gefum og þiggjum – af þessum sérstaka ástarkrafti (sem inniheldur bæði erotík og umhyggju); þar af leiðandi hvernig útkoman úr þessu sérstaka sköpun/endursköpun – eða „framleiðslu“ á okkur sjálfum – stöðugt mótar þær kringumstæður sem við lifum í sem félagsverur (félagslegar kynverur) og hefur þannig áhrif á allt þjóðfélagið.“